IBINTU 21 UKWIYE KUMENYA KURI Fred Gisa RWIGEMA

Umunyarwanda Fred Gisa Rwigema ni umusirikari w’umunyarwanda, watangije urugamba rwo kubohora u Rwanda.

Dore ibintu 20 ukwiriye kumenya kuri Fred Gisa Rwigema:

1. Gisa Fred Rwigema, ni intwari iri mu rwego rw’Imanzi, rumwe mu nzego eshatu z’intwari z’u Rwanda.

2. Gisa Fred Rwigema yavukiye i Ruyumba tariki ya 10 Mata 1957, ubu aho yavukiye ni mu Murenge wa Nyamiyaga ho mu Karere ka Kamonyi mu Ntara y’Amajyepfo.

3. Ababyeyi be ni Anastase Kimonyo na Gatarina Mukandirima, ahabwa amazina ya Emmanuel Gisa.

4. Yashakanye na Jeannette Urujeni bakora ubukwe tariki 20 Kamena 1987.

5. Abana yabyaranye na Jeannette Urujeni ni 2  umuhungu n’umukobwa, abo bakaba ari Gisa Junior na Gisa Teta.

6. Intambara n’imyivumbagatanyo yabaye mu Rwanda mu mwaka w’1959 na 1960, yaranzwe no gutoteza no kwica Abatutsi ndetse na Anastase Kimonyo; Se wa Gisa Fred Rwigema aratotezwa aranafungwa amara umwaka wose muri gereza. 

7. Nyuma y’uko intambara ikomeje ndetse n’itotezwa ry’Abatutsi ababyeyi be baje guhungira muri Uganda ari naho Rwigema yakuriye.

8. Mu mwaka wa 1966 : Umuryango wa Fred Gisa Rwigema wimuriwe mu nkambi ya kankunge mu gace kitwa Toro aho bari kumwe n’izindi mpunzi z’Abanyarwanda bari barahunze intambara no gutotezwa kwarangwaga mu Rwanda muri icyo gihe,Ni nyuma yuko bari barabanje kuba munkambi y’Impunzi ya Ankole.

9. Fred yize amashuri ye abanza muri Uganda ayarangiza mu mwaka w’1972.

10. Mu mwaka wa 1973: Fred yakomereje amashuri ye yisumbuye mu kigo kitwa’ Mbarara High School “muri Ankole.

11. Fred Gisa Rwigema yakundaga akarasisi ka gisirikare cyane bigatera umuryango we impungenge cyane cyane nyina Gatarina Mukandirima, kuko gukunda ibijyanye n’abasirikare cyane byatumaga bacyeka ko bishobora kuzamuviramo kureka amashuri akigira mu gisirikare.

12. Mu bantu bakomeye Gisa Fred Rwigema yahuriye nabo mu mashuri ndetse bakaba inshuti zikomeye bagatandukanywa n’urupfu, harimo Paul Kagame ubu wabaye Perezida w’u Rwanda kugeza n’ubu.

13. Fred Gisa Rwigema yakundaga gusoma ibitabo by’abaharaniye kubohora ibihugu byabo nka Kwame Nkrumah, Mao-Tse-Tung , Fidel Castro n’abandi bagiye baba abantu b’indashyikirwa ku isi.

14. Mu mwaka w’1974, Fred Rwigema nibwo yaje kureka amashuri asanzwe ajya mu gihugu cya Tanzaniya gukurikirana imyitozo ya gisirikare na politiki, aha we na bagenzi be bari bahamagajwe na Yoweri Kaguta Museveni (ubu uyobora Uganda) washakaga kuzarwanya ubutegetsi bw’igitugu bwa Idi Amin Dada wategekaga Uganda muri icyo gihe.

15. Muri Nyakanga 1976, nibwo Fred Gisa Rwigema n’abo bari kumwe harimo inshuti ye Salim Saleh bakomereje imyitozo mu gihugu cya Mozambike binjira mu ishyaka bita FRELIMO( Mozambique Liberation Front)aho bahuriye n’abandi basirikari barimo Col. Musitu waje kuba umwe mu basirikare bakuru b’Ingabo zari iza FPR-Inkotanyi zatangije kandi zikanatsinda urugamba rwo kubohora u Rwanda.

16. Mu mwaka 1979 Rwigema yagiye mu mutwe wagisirikare warushinzwe kubohora Ubugande witwaga Uganda National Liberation Amy (UNLA)  Yatagiye kumenyekana cyane nyuma y’intambara yakuye kubutegetsi umunyagitugu Idi Amin. Mu 1980.

17. Igihe cy’amatora y’umukuru w’igihugu, Fred Gisa Rwigema yari mu basirikare bakuru bacungaga umutekano wa Yoweli Kaguta Museveni wayoboraga umutwe wa UPM (Uganda Patriotic Movement); umutwe wari ufite umwihariko mu gihugu kuko utari ushingiye ku idini cyangwa ku bwoko nk’uko byari bimenyerewe.

18. Kuwa 11 Gashyantare 1981, hamwe n’abandi basore 27 barimo Abanyarwanda babiri ari bo Rwigema Fred na Paul Kagame, bafatanyije na Kaguta Museveni batangije intambara yo kurwanya ubutegetsi bw’igitugu bwa Obote , bari mu ishyaka bitaga National Resistance Amy(NRA).

19. Mu mwaka wa  1986: batsinze intambara barwanaga na Obote  maze Fred Gisa ahabwa umwanya ukomeye , yagizwe umwugiriza wa Minisitiri w’ingabo za Uganda.

20. Tariki ya 1 Ukwakira 1990 Fred Gisa Rwigema nibwo Yatangije Urugamba rwo kubohora u Rwanda  hamwe n’abandi basirikare bari bari mu mutwe wigabo za Uganda witwaga NRA baje kwibumbira mu mutwe w’ingabo warufite intego yo  kubohora u Rwanda witwaga Rwanda Patriotic Amy(RPA).

21. Tariki ya 2 Ukwakira 1990 ni bwo uwari Umugaba mukuru w’ingabo za RPA(Rwanda Patriotic Amy) Fred Gisa Rwigema yatabarutse aguye kurugamba, bamurasiye kumusozi wa  Nyabwenshogozi I kagitumba ubu ni mu  karere ka Nyagatare mu ntara y’Uburasirazuba.

 

Imvano y’inkuru n’ifoto : Internet

INkuru ya Udahemuka Jean De Dieu.

Last modified on Tuesday, 22 September 2020 12:11

Leave a comment

Make sure you enter all the required information, indicated by an asterisk (*). HTML code is not allowed.

Igiseke

culture-in-rwanda

Kwamamaza

Umurage Wacu 3lOGO UMURAGECqAJqoFW8AAF6RY.jpg large

Facebook

Inkuru zose

© 2016  Umurage Wacu  Group 

Tel:+250 783541018 /728541018

Email:umuragewacugroup@gmail.com

Address:Kigali-Rwanda

Design by FRI SOFT Ltd