Ibintu byo gusura ku musozi wa Kigali

Umusozi wa Kigali ni umwe mu misozi miremire  iri mu murwa w’u Rwanda, ni umusozi ufite amateka, umusozi witwaga Ruhango ya Bwanacyambwe,  witiriwe Kigali,  umurwa w'u Rwanda. Umusozi wa Kigali ukora ku mirenge  ine; Nyamirambo, Mageragere ,Kigali na Kimisagara  yose yo mu karere ka Nyarugenge.

Ku musozi wa Kigali uba ureba ahantu hatandukanye mu gihugu, uba ureba umujyi wa Kigali wose, ukareba uburasirazuba, mu majyepfo no mu majyaruguru by’u Rwanda.

Dore ibintu byo gusura kuri uyu musozi

1. Kuzamuka umusozi

Mbere yo gusura ibintu biwuriho uzabanza uwuzamuke! Umusozi wa Kigali kuwugeraho bisaba kuzamuka, bitewe n’aho waturutse Matimba, cyangwa wazamukiye Gitikinyoni kureba ubuvumo, cyangwa waturutse ku kiraro cya Nyabarongo cyangwa Mageragere,hose bizagusaba kuzamuka. Ni ukumenya uko ugomba kwambara.

2. Gusura Ibigabiro by’umwami

Kuri yu musozi hariho ibigabiro (urugo) by’umwami  Kigeli IV Rwabugiri Sezisoni  wategetse ahasaga mu myaka ….Umwami Rwabugili  yataye umugore we Bashyakaza Watayekotero kuri uyu musozi amaze kumusuzugura. Maze umwami ahita mu  Ruhango rwa Nanga Ingare.  Ni ibigabiro biragwa n’ibiti by’imivumu bihari, bikikije aha hoze urugo rwe.

3. Gusura Mera Neza

Mera neza ni ahantu heza h’ishyamba ry’ibiti bya pinus, ni ahantu hatuje, hameze neza ho kwigira, no gusoma ibitabo no kwifotoza. Ni ahantu haza abantu benshi  ari abaje gusenga, kuganira ndetse gutembera.  Uzirinde kuhata imyanda nk’amacupa cyangwa ibindi bintu waba witwaje!

4. Kureba Inkende

Ku musozi wa Kigali wabasha kubona inyamaswa z’inkende ziba zigenda hirya ni hino, izi nyamaswa ziboneka hafi y’ishyamba rya Mera Neza. Zikunda kuboneka mu masaha ya mugitondo nka saa tatu ndetse na nimugoroba 4pm.Uzirikinde kuba hari ikintu wajugunya hasi nk’icupa ry’imitobe cyangwa ibindi bintu birimo ibyo kurya, mu rwego rwo kwirinda kuba wazanduza.

5. Gutwara ifarasi kuri Fazenda

Hazwi nko ku Mafarasi! Abakunzi bo gutwara amafarasi, cyangwa ushaka no kubyiga, ku musozi wa Kigali wabasha gutwara ifarasi, nawe ukagira ubumenyi bwo kuyobora iyo nyamaswa! Ni ahantu wabasha kwicara ukaruhuka, ugatekereza neza,  mukaganira, ukareba  imisozi , ikibaya  n’uruzi rwa Nyabarongo.

6. Gusura Ikirenge cy’Umwami Ruganzu

Kuri uyu musozi  wabasha gusura urutare ruriho ibirenge by’Umwami Ruganzu, nkuko ari umwami wagiye usiga ibintu bimuranga ahantu hatandukanye. Ni ibirenge biri hirya hafi y’amashuri yo mu Rugarama, mu Kagari ka Gasharu. Iyo uri kuri ibyo birenge uba uteganye na Mageragere, ureba Nyarufunzo hepfo yawe. Ikibazo ni uko nta kintu kiharanga uretse kubaza nk’umuntu mwahahurira kuko abenshi barahazi!

7. Kusura Alitari ya Centrale ya Rugarama

Ku musozi wa Kigali mu Kagari ka Rugarama hari ibisigazwa bya Alitari ya Centrale ya St Joseph (Rugarama). Ni Centrale yashinzwe hagati y’1957-1961 icyo gihe yari Centrale ya Paroisse  Ste Famille. Ubu basigaye basengera mu y’indi nzu, iyi Centrale ibarizwa muri Paroisse ya St Charles Lwanga (Nyamirambo).

8. Kureba Ubuvumo ku musozi wa Kigali

Hazwi nko kuri Byagwane! Ni ubuvumo buherereye mu murenge wa Kigali, ni ubuvumo buzwi n’abantu bake, cyane cyane ababuturiye aho hantu cyangwa abajya kuhasengera. Kubusura uzamukira ku Gitikinyoni ni ahantu h’iminota 20-30, bahita kuri  Ruhondo. Ushaka kubwinjiramo wahamagara nyiri ubutaka burimo ubwinjiriro kuri  0788 804 771.

9. Gusura ababubyi b’inkono

Gusura abantu basigasiye umurage wa bakurambere babo, umwuga w’ubububyi  umaze imyaka myinshi mu Rwanda bakaba bakiwukora. Ni ugufata  umwanya ukamenya uko babumba inkono, amavaze, Ibibindi, Imbabura, ukamenya  amazina y’ibikoresho bakoresha n’ibindi. Ubasha gukora icyo ushaka kikaba urwibutso rw’urugendo rwawe.  Ababubyi baba mu Mudugudu wa Vuganyana mu Murenge wa Kigali, kugerayo unyura umuhanda ugana kuri Gereza ya Kigali, uri  hafi y’igishanga cya Nyarufunzo ku birenge by’umusozi wa Kigali.

10. Gusura ku Kitabi no Kusigiro

Ni ahantu abantu bicaraga bamaze kuzamuka umusozi wa Kigali, bakarya impamba zabo, bakagura ibyo bashaka, bimwe bakabigurana itabi! Ni ahantu hari ibiti by’imiduha bicaragamo bikinze izuba. Hafi yaho  hari agasozi ka Kisigiro, umwami n’abandi bantu baruhukiragaho bakituganya bakisiga amavuta maze bagakomeza urugendo rwabo bagana I Bwanacyambwe, Gasabo, abandi bagana mu Gisaka, Bugesera n’ahandi. Ubu hari agacentre kariho amazu y'ubucuruzi.

11. Kuruhuka muri Mera Neza Bar

Ahantu ukwiriye gusura , ukaruhuka, mwaba muri itsinda ry’abantu ni umwanya wo kwicara mu kaganira iby’urugendo rwanyu, aho mwasuye. Muri Mera Neza Bar ni ahantu wabasha kurya urukwavu, inkoko byokeje neza!

12. Gusura agazosi ka Mwurire

Ni agasozi kari kuri uyu musozi wa Kigali, agasozi umwami Rwabugiri yahuriyeho n’ingabo ze ubwo yari avuye mu rugo rwe rwari kuri uyu musozi, arutayemo umugore we wari wigize ingare.

13. Gusura imirimo y'ubuhinzi

Mu ntangiriro z'umusozi wa kigali,hakikijwe n'imirimo y'ubuhinzi,haba mu gishanga cya Mageragere,cya Nyarufunzo,cya Nyabarongo n'icya Gitikinyoni hose uhasanga abakora imirimo y'ubuhinzi.Haba hari abarimo kuhira,gutabira, kurima, gusarura, gutera imiti, kubagara n'ibindi birimo ubworozi bw'inka,inkoko n'ingurube mu duce dutandukanye twegereye igishanga. Ni byiza gufata akanya ugakora urugendo ukaganira nabo, ukamenya ibyo barimo gukora, ukabagira inama, ukabagurira, ugatembereza abana n'inshuti, ibigo by'amashuri byakora urugendoshuri n'ibindi.

 

Last modified on Saturday, 14 July 2018 10:38

Leave a comment

Make sure you enter all the required information, indicated by an asterisk (*). HTML code is not allowed.

Igiseke

culture-in-rwanda

Kwamamaza

Umurage Wacu 3lOGO UMURAGECqAJqoFW8AAF6RY.jpg large

Facebook

Inkuru zose

© 2016  Umurage Wacu  Group 

Tel:+250 783541018 /728541018

Email:umuragewacugroup@gmail.com

Address:Kigali-Rwanda

Design by FRI SOFT Ltd