Ahantu 9 mu Rwanda wakorera Urugendo Nyobokamana

Abanyarwanda benshi ni abakirisitu/abakirisito ni abantu bakunda gusenga, mu bice bitandukanye by’u Rwanda hari ahantu hemewe ho gukorera ingendo nyobokamana.

Ingendo nyobokamana ziteza imbere ubukerarugendo bw’imbere mu gihugu, abaturage bakora ingendo bagana aho hantu, bakajya gusenga, gusaba no gushimira imana. Ni ahantu haboneka n’amacumbi afasha abantu bashaka gucumbika, kubona aho bacumbika baje gukora amasengesho amara iminsi.

1. Kwa Nyina wa Jambo I Kibeho (Nyaruguru)

I kibeho, ku matiriki atandukanye yo mu myaka 1981-1989, Bikira Mariya yabonekeye abakobwa b’abanyarwandakazi aribo;  Alphonsine Mumureke, Nathalie Mukamazimpaka, Marie Claire Mukangango bigaga mu ishuri rya G.S Mère du Verbe ry’Ababikira b’Abenebikira , Bikira Mariya yabahaye ubutumwa 12 buboneka I Kibeho.

Buri mwaka abantu baturutse hirya no hino bahakorera urugendo bagiye kuhasura, gusenga, gukora umwiherero. Bakahavana amazi n’ibumba biva ku isoko ya Bikira Mariya. Ku matariki ; ya 15 Kanama ku munsi mukuru w’ijyanwa mu ijuru rya Bikira Mariya/Assomption na tariki ya 28 Ugushyingo ku munsi habaye amabonekerwa ya mbere, haza imbaga y’abantu baturutse impande zose z’isi.

 

Niho hantu hemewe muri Afurika habereye amabonekerwa. Wagiye gusengera I Kibeho ntuzibagirwe no kujya gusengera I Nyarushishi.

2. Kwa Yezu Nyirimpuhwe mu Ruhango

Mu kibaya cya Yezu Nyirimpuhwe mu Ruhango, ahantu habera isengesho ryo gukiza indwara, gusabirira ingo, umuryango, gusabira ibibazo abantu bahura nabyo buri munsi

Ni isengesho riba ku cyumweru cya mbere cya buri kwezi,hari abahitamo kuharara bakarara basenga,hari ingoro y’impuhwe z’imana. Abantu bahagana ari benshi kurushaho ku munsi mukuru w’impuhwe z’imana. Ku munsi w'impuhwe z'Imana, icyumweru gikurikira Pasika, haba hateraniye abantu bavuye hirya no hino kwizihiza uwo munsi mukuru wo kuzirikana ku mpuhwe z'Imana, haba umutambagiro, gusenga, inyigisho ku mpuhwez'Imana no gushimira Imana.

3. Mu Ibanga  ry’Amahoro I Rusizi

Hazwi nko kwa Padiri Obald, ni urugendo nyobokamana rwo kujya gusengera mu ibanga ry'amahoro, ahantu umuntu ajya gusenga, gusaba amahoro mu mutima, mu muryango no mu nshuti. Kiliziya yafunguwe tariki ya 13 Kanama 2019. Haherereye mu murenge wa Nkaka.

4. Ku ngoro y’impuhwe z’Imana I Kibuga

Urugendo rwo kujya gusengera I Kabuga, ni urugendo rufasha abajyayo gusenga, gukora inzira y’umusaraba, guhongerera ibyaha.

Ni ahantu bagira gahunda y’amasengesho ahabera buri kwezi, hari iminsi mu cyumweru iba ifite gahunda ijyanye n’amasengesho. Ku munsi w'impuhwe z'Imana, icyumweru gikurikira Pasika, haba hateraniye abantu bavuye hirya no hino kwizihiza uwo munsi mukuru wo kuzirikana ku mpuhwe z'Imana.

5. Ku ibanga ry’Ishya n’Amahoro I Jali

Ku musozi wa Jali muri Gasabo, habera urugendo rw’abantu bashaka gusenga, bagakora inzira y’umusaraba, bibuka ububabare bwa Yezu.

Abantu bakunda kujya kuhasengera buri wa Kabiri guhera saa Tatu za mugitondo bagahurira haruguru y’amagaraje ahazwi nko mu Gatsata.

6. Urugendo ku Kiliziya ya Kirisitu Umwami I Nyanza

Buri mwaka ku munsi mukuru wa Kirisitu umwami, abakirisitu bajya gusengera muri Kiliziya yatuwe Yezu Kristu I Nyanza.  Ni Kiliziya umwami w’u Rwanda Mutara III Rudahigwa yatuye Kristu, umuhango wabaye iminsi itatu 26-28 Ukwakira 1946.

Kuri uwo munsi umwami yavuze isengesho atura  Imana ,u Rwanda n’Abanyarwanda, witabirwa na Musenyeri la Classe, umwami ubwe n’umugabekazi  Nyiramavugo Kankazi, Rezida n’abandi barimo abatware n’abaturage bavuye hirya no hino. Umwami yahawe batisimu yitwa Charles  Léon Pierre.

 

7. Urugendo mu Ngoro y’Umutima mutagatifu wa Yezu (Kicukiro)

 

Amasengesho ya buri wa Gatandatu usoza ukwezi muri Kiliziya y’Umutima Mutagatifu wa Yezu, ahazwi nko kuri Communauté de l’Emmanuel, habera isengesho ry’Abarwayi, gusengera ibyifuzo bitandukanye, kubohoka, gukira ibikomere, gushimira Imana.

 

Buri wa Gatanu wa mbere w’Ukwezi haba umwiherero (9am-2pm) gusingiza Imana, ubutayu na misa. Hatangiye umwiherero mu cyongereza (English);5pm-8pm. Kwa Gatandatu; kwisunga umutima mutagatifu wa Bikira Mariya; Inyigisho, Rozari na Misa.

 

Ni byiza kwibuka gusiga ibyifuzo byawe muri Shapeli, gusengera mu busitani bwa Nyina wa Jambo. Kandi n’iminsi yose igihe ushaka gusenga wahagana ndetse no kwitabira izindi gahunda za Communauté de l’Emmanuel.

 

Ni ku Kicukiro hafi ya Kaminuza ya UNILAK. Umpanukira Sonatube.

 

8. Mu Ingoro ya Bikira Mariya Umwamikazi w’I Fatima (Ruhengeri/Musanze)

 

Ingoro yitiriwe Bikira Mariya Umwamikazi w’I Fatima iherereye mu mujyi wa Musanze, muri Paruwasi Katedrali ya Ruhengeri. Buri mwaka tariki ya 13 Gicurasi , umunsi ngarukamwaka wo kwizihiza amabonekerwa y’I Fatima, hahurira abakirisitu baturutse impande zose z’u Rwanda cyane cyane abo muri Diyosezi ya Ruhengeri no mu nkengero zayo.

 

Iyi ngoro yitiriwe uyu mubyeyi kuva mu mwaka wa 1954.

 

9. Urugendo mu Ingoro ya Bikira Mariya Umubyeyi w’Abakene (Crête-Congo Nili/Rutsiro)

 

Bikira Mariya ni umurinzi n’Umuvugizi wa Diyosezi ya Nyundo,ni ahantu ku musozi, haherereye muri Diyosezi ya Nyundo hazwi nk’I Crête-Congo Nili, hakorerwa ingendo nyobokamana zo kujya kwayambaza umubyeyi Bikira Mariya Umubyeyi w’Abakene. Abantu batanga ubuhamya ko icyo basabye umubyeyi Bikira Mariya abasubiza.

 

Mgr Bigirumwami Aloys wari umwepisikopi wa Diyosezi ya Nyundo, niwe wagize igitekerezo cyo gushaka ahantu yashyira ishusho ya Bikira Mariya muri Diyosezi ye, abantu bajya baza kwambariza umubyeyi Bikira Mariya, yari mu rugendo nyobokamana I Benneux mu gihugu cy’ububiligi (1952).

 

Ndi Umubyeyi w’Abakene, amagambo umubyeyi Bikira Mariya yabwiye Mariette Beco (imyaka 11) ubwo yamubonekeraga kuva 15 Mutarama-2 Werurwe 1933 ku musozi wa Benneux (Ububiligi).

Gukora urugendo nyobokamana bisaba kurukora waruteguye, ufite umwanya, atari ikigare, ukigomwa ibindi ukumva ko ushaka kwegera Imana

 

Yezu/Yesu  Ndakwizera

Last modified on Friday, 29 April 2022 11:03

Leave a comment

Make sure you enter all the required information, indicated by an asterisk (*). HTML code is not allowed.

Igiseke

culture-in-rwanda

Kwamamaza

Umurage Wacu 3lOGO UMURAGECqAJqoFW8AAF6RY.jpg large

Facebook

Inkuru zose

© 2016  Umurage Wacu  Group 

Tel:+250 783541018 /728541018

Email:umuragewacugroup@gmail.com

Address:Kigali-Rwanda

Design by FRI SOFT Ltd